Царинската управа на Република Македонија, денес поднесе кривична пријава против четири физички лица на возраст од 22 и 20 години,државјани на Република Македонија, под сомнение дека извршиле кривично дело „Неовластено производство и пуштање во промет на наркотични дроги, психотропни супстанции и прекурсори” и  ,,Помагање на сторител по извршено кривично дело”.

 

Имено, вчера (29.07.2010) на излез од Република Македонија на граничниот премин Деве Баир пристигнало патничко моторно возило  Мерцедес со бугарски  регистарски таблички, во кое покрај возачот патувале уште 3 лица, сите македонски државјани.

 

Бидејќи еден од патниците бил предходно осуден за исто кривично дело, полициските службеници го повикале во полициската станица на самиот граничен премин за да му ја одземат патната исправа. При излегување од возилото, од џебот на панталоните извадил една кесичка обвиткана со селотејп и ја фрлил на седиштето. Додека се качувал по скалите на полициската станица, од ногавицата му испаднала уште една кесичка, обвиткана со селотејп.  Во тој момент била повикана мобилна екипа на Царинската управа за да изврши преглед на возилото и претрес на патниците.

 

При деталниот преглед на возилото, во шише од шампон (чија содржина претходно била истурена во џебот на возачкото седиште), потоа во влажни марамици, како и помеѓу задните седишта, била пронајдена зеленкастата сува материја – вкупно 180 грама, за која по извршеното тестирање било утврдено дека е марихуана. Во дигиталнен фотоапарт пак, поточно во делот за батерии биле пронајдени 5 грама бела прашкаста материја, за која со  тестирање било утврдено дека е кокаин.

Првичните сознанија дека станува збор за марихуана и кокаин, денес беа потврдени и од Одделението за крим техника при МВР по извршената анализа.

 

Предметот и целокупниот материјал е предаден на Основното јавно обвинителство Куманово за понатамошно постапување.